रवि र बालेन शाहले गरे ७ बुंदे सहमति

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौँ महानगरपालिकाका मेयर बालेन शाहबीच राजनीतिक सहकार्यका लागि औपचारिक समझदारी भएको छ। दुवै पक्षले आइतबार एकाबिहानै  ७ बुँदे सहमति गरेका हुन् ।

सहमति अनुसार राष्ट्रिय स्वतन्त्र पार्टीको समग्र नेतृत्व रवि लामिछानेले सम्हाल्नेछन् भने आगामी मध्यावधि चुनावमा बालेन शाहलाई प्रधानमन्त्रीको उम्मेदवारका रूपमा अघि बढाउने सहमति गरिएको छ।

राजनीतिक सहकार्यलाई संस्थागत रूप दिन तयार पारिएको सम्झौतापत्रमा रास्वपा सभापति लामिछाने र  बालेन शाहले हस्ताक्षर गरेका छन्।

सहकारी सम्बन्धि अभियोगमा हालै धरौटीमा थुनामुक्त भए पनि उक्त मुद्दाको अन्तिम फैसला नहुँदा सम्म रवि लामिछाने कुनै पनि कार्यकारी पदमा जान नमिल्ने भए पछि उनी बालेनलाई पार्टीमा भित्र्याउन सहमत भएको बताइएको छ।  यस अघि अचानक राजनीतिक गतिविधि तीव्र पारेका बालेन  शाहले छुट्टै पार्टी दर्ता गरेर चुनावमा जाने तयारी गरिरहेको समाचारहरु आएका थिए। अन्तरिम सरकारका  मंत्री कुलमान घिसिङ्ग संरक्षक रहेको उज्यालो नेपाल पार्टीसंगको सहकार्यको बारेमा भने सहमतिमा केही उल्लेख छैन।

हेर्नुहोस्,  ७ बुँदे सहमति :

१. नवयुवाहरुले भ्रष्टाचार र कुशासन विरुद्ध गरेको आन्दोलनको अपनत्व लिई घाईते तथा शहिद परिवारका मागहरुको यथोचित सम्वोधन गर्ने प्रतिवद्धता जनाउने,

२. समुन्नति र सामाजिक न्यायका राष्ट्रिय उद्देश्यहरुका लागि गरिनु पर्ने गहिरा नीतिगत, संस्थागत एवं संरचनात्मक सुधारहरु मार्फत आर्थिक सामाजिक उन्नयन र सुसंस्कृत राजनीतिक अभ्यासको जगमा अर्को दश वर्षभित्र नेपाललाई सम्मानजनक मध्यम आय भएको राष्ट्र बनाउने मार्गचित्रको इमान्दार कार्यान्वयनप्रति समर्पित हुने,

३. पहिलो पक्ष र दोश्रो पक्षबीच बृहत् एकता भए पश्चात् स्थापित हुने राजनीतिक दलको नाम राष्ट्रिय स्वतन्त्र पार्टी, दलको झण्डा साविककै निलो पृष्ठभूमिको मध्य भागमा सेतो रङ्गको गोलाकार बीचमा निलो रङ्गको घण्टीको आकृति, दलको चुनाव चिन्ह घण्टी र केन्द्रीय कार्यालय काठमाडौँ उपत्यकामा रहने,

४. राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने,

५. बृहत् एकता पश्चात् पार्टीको संगठनात्मक संरचनालाई थप सक्षम र फराकिलो बनाउन युवा अभियन्ता एवं अनुभवी विज्ञहरुलाई समुचित समायोजन गर्दै जिम्मेवारी तोक्दा योग्यता, समावेशिता र सार्वजनिक छविलाई आधार मान्ने,

६. यस सम्झौता बमोजिम राष्ट्रिय स्वतन्त्र पार्टी सम्बन्धी दस्तावेज निर्वाचन आयोगमा अद्यावधिक गर्ने,

७. राष्ट्रिय स्वतन्त्र पार्टीको सिद्धान्त, नेतृत्व र चुनाव चिन्ह 'घण्टी' मा गोलबद्ध भइ लोकतान्त्रिक सुशासन, समुन्नति र सामाजिक न्यायका मुद्दा अघि बढाउन अन्य सुसंस्कृत एवं परिवर्तनकामी वैकल्पिक राजनीतिक शक्ति, समूह र व्यक्तिहरुलाई आव्हान गर्ने।

रवि लामिछाने बालेन शाह
१३ पुस, २०८२
काठमाडौं