नेपालको लिपुलेक नाकाबारे चीनसँग कुरा उठाउन प्रधानमन्त्रीलाई मेयर बालेनको आग्रह

काठमाडौं । काठमाडौं महानगरपालिकाका प्रमुख बालेन्द्र शाह (बालेन) ले चीन भ्रमणमा रहेका प्रधानमन्त्री केपी शर्मा ओलीलाई नेपालको लिपुलेक नाकाबारे चीनसँग कुरा उठाउन आग्रह गरेका छन् ।

प्रधानमन्त्री ओलीसहितको प्रतिनिधिमण्डल शनिबार चीन प्रस्थान गरेलगत्तै सामाजिक सञ्जालमार्फत मेयर शाहले यस्तो आग्रह गरेका हुन् । उनले भारत र चीनबीच नेपालको लिपुलेक नाकाबाट व्यापार पुनः सञ्चालन गर्ने सहमतिले नेपालको सार्वभौमिकतामाथि अतिक्रमण भएको उल्लेख गर्दै यस विषयमा चिनियाँ पक्षसँग कुरा गर्न प्रधानमन्त्रीलाई अनुरोध गरेका हुन् ।

मेयर शाहले लेखेका छन्, 'चीन भ्रमणको शुभकामना प्रधानमन्त्रीज्यू । नेपालको लिपुलेक नाकाबाट व्यापार पुनः सञ्चालन गर्ने भारत–चीनको सहमतिले हाम्रो सार्वभौमिकतामाथि अतिक्रमण गरेको छ, त्यो हाम्रो नै हो भन्ने कुरा चीनलाई सम्झाउन नबिर्सनु होला । अल द बेस्ट, हामीलाई तपाईंमाथि पूर्ण विश्वास छ ।'

उनले प्रधानमन्त्री ओलीले यस विषयमा कुरा उठाउनेमा आफूलाई पूर्ण विश्वास रहेको पनि उल्लेख गरेका छन् ।